Teksa hedhja e vajit në rrugë bëhët shkak për aksidente të shumta, eksperti i sigurisë rrugore, Arben Luzi, e ka quajtur këtë si një akt terrorist dhe të barabartë me vendosjen e një bombe. Sipas tij personat që e bëjënë këtë veprim të qëllimshëm nuk mendojnë për pasojat që mund të sjellë. Gjatë një interviste në një emision në “Euroneës”, ai tha se këto raste nuk duhen trajtuar si aksidente, por si akte terroriste dhe është një skandal i madh që duhet denoncuar.
“Nuk mund të themi se hedhja e vajit është aksident, hedhja e vajit është një veprim i qëllimshëm e sipas meje është i barabartë me vendosjen e një bombe, është një akt terrorist. Pasi ti ku hedh vajin, nuk e di se kush do kalojë aty, do kalojë një autobus, një veturë, një furgon me pasagjerë të shumtë. Kjo nuk duhet trajtuar si një aksident, është një skandal i madh që po ndodh në Shqipëri, në raste të tilla kalimtarët duhet të njoftojnë policinë e shtetit”, tha eksperti.
Kujtojmë se më herët profesori i kriminologjisë, Ervin Karamuço ka reaguar në lidhje me 6 aksidentet automobilistike të regjistruara në aksin rrugor Qafë Thanë – Prrenjas, ku humbi jetën dhe një shtetase gjermane dhe dyshohet se janë shkaktuar nga hedhja e vajit në rrugë nga firmat e karrotrecave. Në një postim në rrjetet sociale, Karamuço e konsideron si akt çnjerëzor, teksa thotë se ky krim ende nuk është konfirmuar nga Policia. Ai shton më tej se hedhja e vajit në disa akse rrugore po krijon aksidente, të vdekur dhe panik publik.
