Teksa po zhvillohet seanca plenare ditën e sotme ka pasur debate të forta midis Gazment Bardhit dhe ministres së Energjisë Belinda Ballukut.
Kreu i grupit parlamentar të PD-së Gazment Bardhi, pyeti Ballukun se sa e ka tarifën e korrupsionit për kompanitë private që fitojnë tendera, duke iu referuar edhe arrestimeve në Ministrinë e Shëndetësisë, të sekretares.
“Këto ditë mësuam se qeveria ka rritur tarifën e korrupsionit. Nga një tender modest 8 milionë lekë i ministrisë së Shëndetësisë kuptuam se tarifa e korrupsionit ka shkuar 40%. Kur kryeministri hyri në politik njihej si mister 10 përqindëshi.
Sot kemi një kryeministër me etje për pushtet. Sa me e madhe dëshira për pushtet aq më i madh është korrupsioni. 40% vjedhin këta vetëm me një tender. Por duan që populli të besojnë se ky është një rast i izoluar se këta nuk janë të gjithë hajdutë.
Populli thotë se peshku qelbet nga koka. Rama jo vetëm që nuk ka bërë asgjë për të luftuar korrupsionin po ka shkatërruar sistemin demokratik. Pyes ministren e energjitikës se sa e ka tarifën ajo dhe sekretarja e saj për fitimin e tenderave”, tha ndër të tjera Gazment Bardhi. Por i menjëhershëm ka qenë reagimi i Ballukut, e cila akuzoi Bardhin se merr para nga kompani private për të dërguar çështjet e tyre në Gjykatën Kushtetuese. “Nuk flet dot ti për ndershmëri në këtë sallë, sa para merrni nga kompanitë private, që vetëofroheni për të dërguar çështjet e tyre në Gjykatën Kushtetuese, edhe pse shkelen interesat e shtetit shqiptar”, tha Balluku.
Ministrja duket se i referohet çështjes për konfiskimin e pronave pa leje, që është dërguar nga opozita në Gjykatën Kushtetuese.
