Ish-Kryeministri, Sali Berisha përmes një postimi në rrjetet sociale ka dënuar sulmin me breshëri kallashnikovi ndaj “Top Channel” ku fatkeqsisht mbetii vrarë roja i objektit, Pal Kola.
Duke i shprehur ngushëllime familjes së viktimës, miqve, të afërmve dhe kolektivit të Top Channel, Berisha thekson se akti kriminal është një tjetër dëshmi e dhimbshme e pasigurisë së plotë, që ekziston sot në vend.
“Një akt kriminal i shëmtuar. Sulmohet me armë zjarri Top Channel dhe ekzekutohet në kabinën e tij roja e objektit.
Dënoj me ashpërsinë më të madhe këtë akt të shëmtuar kriminal dhe i shpreh ngushëllimet e mia më të ndjera familjes së viktimës, miqve, të afërmve dhe kolektivit të Top Channel.
Denoncoj këtë akt kriminal, si dëshmi tjetër e dhimbshme e pasigurisë së plotë, që ekziston sot në vend nga vendosja e rendit nga regjimi në duart e krimit”- shkruan Berisha.
Ngjarja ka ndodhur për motive ende të paqarta, ndërsa forcat e policisë dhe ekspetët e kriminalistikës janë në vendngjarje dhe po marrin provat e nevojshme që mund të ndihmojnë hetimin. Ndërkohë një makinë tip Range Rover është gjetur e djegur në afërsi të Kavajës, e cila dyshohet se iu përket autorëve, pasi dhe targat e makinës mësohet se janë të vjedhura.
