Për sa i përket ngjarjeve kriminale në vendin tonë, kryeministri Edi Rama është shprehur se numri i vrasjeve të ndodhura përgjatë vitit 2022 është ulur me 30% krahasuar me vitin e kaluar.
Me anë të një statusi në rrjetet sociale Rama tha se 2022-shi ka qenë viti me numrin më të ulët të vrasjeve në tre dekadat e fundit duke shtuar më tej se qeveria ka ende shumë punë për të bërë.
“#FAKT kuptimplotë që na jep një shembull flagrant të hendekut mes jehonës shurdhuese mediatike dhe realitetit të rënies së vijueshme të krimit. 2022 numri më i ulët i vrasjeve në tre dekadat e fundit
#KUJTESË: Kur ne e nisëm përpjekjen kundër krimit vrasjet ishin 112 në harkun e një viti dhe si rregull mesatarja ishte 100 në vit
#Normale, dihet që më e keqja harrohet shpejt, e mira s’ka fund kurrë dhe nga ana tjetër, padiskutim, ka ende shumë për të bërë”, është shprehur Rama.
Vlen të theksojmë se vetëm në 7 muajt e parë të vitit 2022, në vendin tonë kanë ndodhur në total 24 vrasje që kanë shkaktuar 27 viktima. Referuar të dhënave, 13 ngjarje janë zbardhur autorë të të cilave janë arrestuar e të shpallur në kërkim, ndërsa 11 të tjerat vijojnë të jenë pa autorë, e kryesisht vrasjet e tipit mafiozë.
Numrin më të lartë të kriminalitetit, gjatë këtyre 7 muajve e mban Shkodra. Nga Janari deri më tani në këtë qark kanë ndodhur 6 vrasje. Pasohet nga Fieri me 5 ngjarje dhe 4 në Tiranë, e më pak vrasje në qarqet e tjera të vendit.
