Në “Pakon e Madhe” që ofrohet nga qeveria në kuadër të lehtësismit të jetës për disa kategori teksa ndodhemi në kushte krize, përfitojnë edhe policët.
Kryeministri Edi Rama do t’u japë 1000 lekë (të reja) shpërblim punonjësve të policisë nga “Pakoja e Madhe”. Lajmin e bëri me dije vetë kryeministri përmes një postimi në rrjetet sociale.
“10000Lekë (të reja) nga Pakoja e Madhe, pas rritjes së pagave para disa muajsh me 15% për punonjësit e terrenit dhe 7% për komisarët e Policisë së Shtetit, do ta zerojnë impaktin e inflacionit të luftës mbi konsumin e tyre familjar në këtë dimër të vështirë për të gjithë, duke dëshmuar po ashtu vëmendjen e pandarë të qeverisë jo vetëm ndaj shtresave më në nevojë, po edhe ndaj shërbëtorëve të shtetit e të popullit shqiptar”- shkruan Edi Rama
Rreth 1 milionë shqiptarë pritet të përfitojnë nga paketa që Qeveria po përgatit për të ndikuar në lehtësimin e ndikimeve të inflacionit. Pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, punonjësit e shtetit do përfitojnë nga kjo paketë.
Gjithashtu sot, kryeministri Edi Rama ka njoftuar përmes një postimi në ‘Facebook’ se 695 pensionistë do të marrin 8000 lekë të reja secili nga ‘Pakoja e Madhe’.
Ndërkohë opozita dhe skeptikër e konsiderojnë këtë paketë si veprim strategjik teksa ndodhemi disa muaj para zgjedhjeve lokale.
