Mëngjesin e ditës së sotme, IKMT ka zbarkuar në rrugën “Myslym Keta” për të shembur pallatin e piketuar të njësisë 4. Ndërkohë që banorëve prej ditësh u ishte ndërprerë energjia elektrike dhe uji në banesa.
Disa prej tyre kanë dëshmuar se nuk ka vendim gjykate për prishjen e pallatit teksa sipas tyre vendimi nëse pallati është i banueshëm apo jo pas dëmtimit nga tërmeti i 26 nëntorit ka ndryshuar disa herë.
Theksojmë se vendimi i fundit për shkallën e vlerësimit të pallatit e ka shpallur atë të pabanueshëm duke vendosur dhe shembjen e tij.
Ndërkohë që deputeti i Partisë Demokratike, njëkohësisht kandidati i Partisë Demokratike për Bashkinë Tiranë, Belind Këlliçi ka akuzuar kryetarin e Bashkisë Tiranë, Erion Veliaj për shembjen e pallatit nr.4 në rrugën “Myslym Keta” në Tiranë. Në një postim në rrjetin social “Facebook”, pas nisjes së shembjes së pallatit, Belind Këlliçi shkruan se qindra policë janë mbledhur për të mbrojtur paligjshmërinë e kryetarit të bashkisë së Tiranës, Erion Veliaj.
“Për të prishur e shkatërruar, shteti zgjohet që pa gdhirë. Një batalion me qindra policë mbron paligjshmërinë e kryetarit të bashkisë. Nuk duronin dot sa të shprehej gjykata. Zdromsit i hanë duart për pare”, shkruan deputeti i Partisë Demokratike Belind Këlliçi.
