Në orët e para të mëngjesit të sotëm një makinë, e cila është në pronësi të biznesmenit Ndue Pjetrushi (Noshi) të njohur në fushën e hidrokarbureve është djegur. Ngjarja ka ndodhur në orën 04:00 të mëngjesit kur makina ka qenë e parkuar jashtë vilës tre katëshe në pronësi të biznesmenit në Ishull Shëngjin.
Duke folur për mediat biznesmeni i hidrokarbureve tha se nuk ka konflikt me askëndë dhe pret që Policia të zbardhë ngjarjen. Ai u shpreh se në fillim kishte dëgjuar një shpërthim më pas kur kishte dalë jashtë kishte parë makinë që shkrumbohej nga flakët. Pjetrushaj tha se kjo mund të jetë një zjarrvënie e qëllimshme por nuk përjashtoi mundësinë që të jetë dhe një defekt teknik i mjetit.
“Rreth orës 4 pa 10 diçka e tillë isha në gjumë, kur kam dëgjuar një shpërthim të mbytur. Kam dalë në ballkon e kam parë makinën duke e djegur. Në moment kam lajmëruar policinë. Erdhi policia dhe zjarrfikësja dhe bën procedurat e veta. Nuk kam asnjë konflikt me askënd, të gjithë që më njohin e dinë që nuk jam i problemeve. Unë merrem me biznes në fushën e hidrokarbureve. Shteti bën punën e vet. Mund të jetë dhe zjarrvënie e qëllimshme, mund të ketë marrë dhe vetë. Atë mund ta nxjerrë vetëm hetimi. Kamerat nuk kanë punuar, DVR ka pas probleme dhe e kam çuar për ta riparuar”, tha biznesmeni.
NJOFTIMI I POLICISË:
Rreth orës 04:00, në Ishull Shëngjin, është konstatuar duke u djegur mjeti tip “Benz”, në pronësi të shtetasit N. P. 66 vjeç, banues në Lezhë. Mjeti ka qenë i parkuar në anë rruge dhe për pasojë është djegur plotësisht. Grupi hetimor vazhdon veprimet hetimore për zbardhjen e plotë të rrethanave të ngjarjes si dhe përcaktimin e shkakut te djegies.
