Policia në Tiranë ka vepruar me “dorë të hekurt” ndaj drejtuesve të mjeteve të transportit publik.
Në kuadër të parandalimit të aksidenteve rrugore, bëhet me dije se 25 shoferë të urbanëve i janë nënshtruar testit të alkolit. Mësohet se Policia Rrugore e Tiranës ka testuar gjatë 24 orëve të fundit 25 drejtues të mjeteve te transportit publik, për përdorim të alkoolit, me qëllim parandalimin e aksidenteve rrugore dhe për t’iu siguruar qytetarëve, një transport sa më të sigurt.
“Aksion blic dhe kontrolle të befasishme në mjetet e transportit publik, për evidentimin e ndëshkimin e drejtuesve të mjeteve që kryejnë shkelje agresive.
Në këtë kuadër, gjatë 24 orëve të fundit, rëndësi e veçantë i është kushtuar kontrolleve të befasishme të drejtuesve të mjeteve të transportit publik, në linja të ndryshme të autobusëve, në kryeqytet. Ditën e djeshme i janë nënshtruar testit të alkoolit, 25 drejtues të mjeteve të transportit publik, me qëllim parandalimin e aksidenteve rrugore dhe për t’iu siguruar qytetarëve, një transport sa më të sigurte”, thuhet në njoftimin zyrtar të Policisë së Tiranës.
Vlen të kujtojmë se mjetet e transportit publik në Tiranë, janë përfshirë shpesh herë në aksidente, ku është rrezikuar drejtpërdrejt jeta e pasagjerëve.
Mjafton të përmendim aksidentin e urbanit “Green Line” i cili kaloi përmes Lanës, ku fatmirësisht nuk pati të lënduar apo viktima.
