Trazirat në veri të Kosovës janë qetësuar pasi më në fund qarkullimi i është rikthyer normalitetit. Kjo vjen pas heqjes së barrikadave të fundit në Bërnjakë dhe Jarinjë që ishin vendosur nga serbët lokalë në veri të Kosovës.
Ndërkohë që ministri i Brendshëm i Kosovës, Xhelal Sveçla thekson se pas heqjes së barrikave do të shtyhen edhe vendimet përkatëse që “ndezën gjakrat”, konkretisht për dokumentet dhe targat serbe.
Nga ana tjetër pas tensioneve shefi i diplomacisë së Bashkimit Evropian, Josep Borrell, u ka dërguar ftesë krerëve të Kosovës dhe Serbisë, për t’u takuar në Bruksel.
Në takimin ballë për ballë midis midis kryeministrit të Kosovës, Albin Kurti dhe presidentit të Serbisë, Aleksandar Vuçiç, është paralajmëruar se do të bisedohet për të gjitha çështjet e hapura.
Por, duhet theksuar se akoma nuk ka konfirmim të pjesëmarrjes nga asnjëri lider.
Kujtojmë që mbrëmjen e së dielës që kaloi sirenat e alarmit u ndezën në Mitrovicë, duke shkaktuar kështu tension në të gjithë Veriun. Serbët ngritën barrikada, ku raportohet edhe për të shtëna me armë.
Ndërkohë grupe qytetarësh serbë të mbështetur nga Beogradi u hodhën në protesta të dielën kundër vendimeve të qeverisë së Kosovës për masat e reciprocitetit me Serbinë, lidhur me dokumentet e identifikimit dhe përdorimin e targave të lëshuara nga autoritetet serbe.
