I gjenduar para studentëve kryeministri Rama ka shprehur mendimin e tij rreth ndarjes së protestës, ku nuk e ka kursyer edhe opinionin për dy partitë më të mëdha opozitare PD dhe LSI.
Ai ka thënë se protesta realisht ka 3 komponentë dhe ato u dalluan më së shumti sot me ndarjen e vatrave të protestës. Njëkohësisht kryeministri i është drejtuar edhe ‘Lëvizjes Për Universitetin’ për të cilët ka thënë se janë duke ndjekur politikat e Marksit, por që nuk e njohin Marksin.
Fjala e Edi Ramës në emisionin Top Show
“Ka dalë në pah ajo që unë e dija edhe më parë. Protesta ka 3 komponentë të strukturuar dhe me një axhendë që është e tyrja dhe komponenti I studentëve që kanë hallin e tyre dhe të shkollës dhe që nuk janë pjesë e tre komponentëve. Dy janë PD dhe LSI. Pra opozita ka premtuar prej kohësh një revolucion dhe që ka kërcënuar që do ta çojë këtë punë deri në rrëzimin e qeverisë me dhunë. Komponenti tjetër është Lëvizja për Universitetin që nuk ka asnjë lidhje me programin tonë apo me qasjen tonë, janë një grupim marksistësh që nuk e njohin Marksin. Jam i bindur se do të shfaqet tërësisht edhe në ditët në vijim.
Tre strukturat që e kanë gatuar këtë për qëllimet e tyre është pjesa që mua nuk më intereson”, ka thënë Rama