Varianti i ri Covid-19 tashmë po përhapet me shpejtësi në disa vende të botës.
Tashmë në vendin tonë fqinj, Në Maqedoninë e Veriut është zbuluar rasti i parë i variantit Omicron. Ministria e Shëndetësisë në Maqedoninë e Veriut ka konfirmuar lajmin, ndërsa bëhet me dije se rasti i identifikuar është një person i ardhur nga Britania.
Ndërkohë autoritetet shëndetësore bëjnë me dije se pacienti i identifikuar ka shenja të lehta klinike dhe se është izoluar dhe po merr trajtim mjekësor.
Kujtojmë që variant i ri i koronavirusit (ose SARS-CoV-2), i njohur si Omicron (ose B.1.1.529), u identifikua për herë të parë nga shkencëtarët në Afrikën e Jugut më 24 nëntor.
Varianti i fundit i virusit që shkakton sëmundjen COVID-19 besohet të jetë më i transmetueshëm se varianti tashmë shumë i transmetueshëm Delta.
Shkencëtarët janë gjithashtu të shqetësuar se numri i lartë i mutacioneve të variantit mund ta ndihmojë atë të shmangë vaksinimet.
Kur Delta u bë varianti mbizotërues, simptomat e frymëmarrjes së sipërme të ngjashme me të ftohtit u bënë më të zakonshme, ndërsa humbja e shijes dhe nuhatjes u bë më pak e zakonshme se në variantet e tjera.
Me Omicron, disa ekspertë kanë thënë se simptomat duken më të buta se Delta, ndërsa të tjerë thonë se është shumë herët për t’u konfirmuar.
