Karriera e Christian Eriksen ka marrë një kthesë 180 gradë pasi ai pësoi arrest kardiak në Kampionatin Evropian. Vetëm një javë më parë u vendos në Itali që danezi nuk mund të luante më atje, ndaj tani duhet të gjejë alternativa që i lejojnë të vazhdojë të jetë futbollist.
Ai që e tërheq më shumë, sipas Corriere dello Sport, është kthimi te Ajax në Amsterdam, klubi ku ai u rrit përpara se të bënte kalimin te Tottenham. Ndryshe nga Seria A, në Eredivisie lejohet një futbollist, siç është Eriksen, të luajë me një stimulues kardiak, diçka që duhet ta mbajnë për sigurinë e tyre.
Te Ajax ata janë plotësisht të vetëdijshëm për cilësinë e mesfushorit 29-vjeçar. Konkretisht, ai ka luajtur për ta pesë sezone në ekipin e parë, me të cilin ka fituar 3 Eredivisie, një Kupë të Holandës dhe një Superkupë. Nisur edhe nga triumfet në Hollandë, Eriksen e konsideron seriozisht një mundësi rikthimi. Nëse rikthehet, ai nuk do të jetë i vetmi që luan me të tilla probleme. Ish-mbrojtësi i Manchester United, Daley Blind u pajis me një ICD në dhjetor 2019 pasi u diagnostikua me një inflamacion të muskujve të zemrës dhe është ende duke luajtur futboll me Ajax.
Eriksen pësoi arrest kardiak në ndeshjen hapëse të “Euro 2020” të Danimarkës, teksa u desh edhe ndërhyrja e mjekëve për t’i shpëtuar jetën. Prej atëherë futbollisti ka mbetur jashtë fushave të lojës dhe bëri edhe një ndërhyrje në zemër.
