Kryeministri i Maqedonisë së Veriut, Zoran Zev ka dhënë dorëheqjen nga detyra e kreut të Qeverisë dhe kryetarit të Lidhjes Social-Demokrate (LSDM). Vendimi i tij erdhi pas rezultateve të dobëta të partisë që ai drejton në përfundim të balotazhit për zgjedhjet lokale.
“Jap dorëheqjen nga pozita e kryeministrit dhe nga posti i kryetarit të LSDM-së”, ka thënë Zaev teka pranoi përgjegjësinë për humbjen dhe falenderoi qytetarët për pjesëmarrjen.
Ai përgëzoi kundërshtarët për fitoren dhe njoftoi se do të jetë ne detyrë deri në krijimin e qeverisë së re.
“Përgëzoj kundërshtarët tanë për fitoren në këto zgjedhje. Unë marr përgjegjësinë për këtë humbje politike, përfshirë edhe rezultatet e këtyre zgjedhjeve. Jap dorëheqjen si kryeministër dhe kryetar i LSDM-së. Do të qëndroj ende këtu, për aq kohë sa të jetë e nevojshme, për të ndihmuar në riorganizimin e qeverisë së re me një shumicë progresive, e cila ekziston dhe mund të rritet. “Unë si person jam pjesë e LSDM-së dhe mbetem në vijën e parë si anëtar i LSDM-së”, ka thënë Zaev.
Ai e kishte paralajmëruar dorëheqjen pas raundit të parë të zgjedhjeve më 17 tetor, nëse partia e tij do humbiste, duke u ndalur në veçanti te Shkupi.
VMRO-DPMNE arriti të marrë shumicën e votave në zgjedhjet lokale dhe kanë shpallur fitoren në 15 komuna.
