Trajneri i Hungarisë, Marko Rosi e ka quajtur Shqipërinë një kundërshtar të vështirë, pas humbjes që i shkaktoi ekipit të tij në Budapest.
Rosi e ka cilësuar edhe golashënuesin Armando Broja një lojtar të shkëlqyer dhe shtoi se diferencën e bëri cilësia e lojtarëve.
“E kam thënë shpesh që Shqipëria është një kundërshtar i vështirë. E tregoi edhe sot. Topi ishte në një portë dhe pastaj te tjetra. Broja ishte në krah dhe ia doli të shënonte. Lojtar i shkëlqyer. Ne kishim mangësi cilësie në zonën kundërshtare, në finalizim, në pasime, në gjuajtje. Kjo ndjehej. Sa i përket paraqitjes, le të shohim statistikat, në bazë të tyre nuk ishim shumë mbrapa. Diferencën e bëri cilësia e lojtarëve”, ka thënë Rosi.
Para gazetarëve, ai tha se nuk është Jezu Krishti, ndërsa mbajti përgjegjësi për rezultatet, pasi është ai që e vendos ekipin në fushë, por sërish ai nuk e quajti veten përgjegjës për bazën e lojtarëve.
“E kam thënë shpesh që Shqipëria është ekip i mirë, një skuadër që vjen pas nesh sa u përket rezultateve, por një ekip shumë i mirë sa i përket cilësisë. Unë nuk jam Jezu Krishti! Jam këtu që nga viti 2019, në rrugëtimin nga Liga C, në Ligën A dhe në Kampionatin Europian. Mbaj përgjegjësi për rezultatet, pasi jam unë që vendos ekipin në fushë, por baza e lojtarëve nuk është përgjegjësia ime. Nëse ndokush, edhe në privat më rekomandon lojtarë, do të isha i lumtur ta dëgjoja, por ju lutem më rekomandoni lojtarë”, tha trajneri i Hungarisë”, ka thënë trajneri i Hungarisë.
