Olimpiada e Tokios është gjithnjë e më shumë në qendër të vëmendjes teksa ditët për fillimin e saj po numërohen drejt fundit, por kjo nuk është arsyeja e vetme. Pasi u shty me një vit për shkak të pandemisë dhe shkaktoi një debat që përfundoi në mbajtjen e Lojërave pa tifozë, rastet e para me Covid-19 kanë mbërritur në Fshatin Olimpik.
Dy atletë kanë rezultuar pozitivë pasi një koleg i ekipit u infektua gjithashtu, thanë zyrtarët të dielën, duke ngritur frikën e një grupi të infektuarish vetëm disa ditë para ceremonisë së hapjes. Rastet e para që përfshijnë atletët në fshat vijnë një ditë pasi një anëtar i shoqërimit të tyre rezultoi pozitiv në kompleks, i cili do të strehojë mijëra atletë.
Të tre infeksionet u zbuluan ndërsa konkurrentët fluturuan nga e gjithë bota për Lojërat Olimpike të vonuara nga pandemia, të cilat po përballen me kundërshtime të konsiderueshme në Japoni për shkak të rreziqeve të tyre për përhapjen e Covid.
Zëdhënësi i Tokyo 2020 Masa Takaya tha se tre rastet ishin nga i njëjti vend dhe sport. Ata janë të izoluar në dhomat e tyre dhe Tokyo 2020 po u jep ushqim atyre. Po ashtu pjesa tjetër e ekipit u testua, por nuk u identifikuan raste të tjera.
Fshati Olimpik, një kompleks apartamentesh dhe zonash ngrënieje në Tokio, do të strehojë 6,700 atletë dhe zyrtarë në kulmin e tij kur Lojërat e vonuara të vitit 2020 të fillojnë më në fund. Lojërat e Tokios, të cilat do të mbahen kryesisht pas dyerve të mbyllura për të parandaluar infeksionet, janë jopopullore në Japoni, ku sondazhet e opinionit kanë demonstruar vazhdimisht një mungesë mbështetjeje.
Zyrtarët olimpikë kanë qenë në përpjekje për të minimizuar rreziqet shëndetësore të Lojërave, të cilat po zhvillohen në kushte të rrepta anti-koronavirus me atletë të testuar çdo ditë.
