Diçka paska ndryshuar seriozisht dhe Presidenti i Serbisë, Aleksandër Vuçiç, ka folur hapur.
Ai ka thënë pak ditë para ardhjes së kryeministrit italian në Serbi, se Beogradi dhe Prishtina duhet të arrijnë në një kompromis dhe asnjë nuk mund të presë që Serbia ta njohë Kosovën pas marrë asgjë në këmbim.
“Para së gjithash ne kemi nevojë për të arritur një kompromis. Ne nuk mund ta njohim Kosovën, dhe të mos marrim asgjë në këmbim”, – ka thënë Vuçiç në një intervistë me agjencinë italiane ANSA, me rastin e vizitës së ardhshme të kryeministrit italian Giuseppe Conte të mërkurën në Serbi.
Vuçiç ka thënë se ndryshimi i kufijve është një çështje që mund të diskutohet, pasi që nuk i njohin të gjithë si kufij të njëjtë, në varësi të faktit nëse ata e njohën pavarësinë e Kosovës apo jo.
“Ndryshe nga udhëheqësit e Kosovës që për ditë mashtrojnë qytetarët e tyre me premtime jorealiste se Prishtina do të marrë shumë, dhe Beogradi asgjë, detyra ime është që serbëve të ju shpjegoj rëndësinë e kompromisit (me Prishtinën), e cila nuk përfaqëson një humbje por një fitore. Fitore për të ardhmen e Serbisë”, – ka thënë Vuçiç.
Ai ka mohuar se ka pasur një takim me Hashim Thaçin për të biseduar për çështjen e kompromisit. Vuçiç përsëriti se Beogradi nuk do të vazhdojë dialogun me Prishtinën, nëse autoritetet e Kosovës nuk do të heqin taksën 100% të importit të mallrave nga Serbia dhe Bosnja e Hercegovina.
“Nëse nuk arrihet një marrëveshje kompromisi mbi Kosovën do të jetë një katastrofë. Edhe pse çdo gjë duket e vështirë dhe ndonjëherë e pamundur, ne jemi të vendosur për të arritur një kompromis, unë jam i sigurt se mund të vijmë në një zgjidhje me ndihmën e miqve tanë evropianë dhe me mbështetjen e Rusisë, Amerika, Kinës dhe të vendeve tjera”, – tha Presidenti i Serbisë.
“Problemi është mes serbëve dhe shqiptarëve nga Kosova, ne nuk mund të kritikojmë Evropën e cila ka bërë gjithçka që mundet për të ruajtur paqen”, – ka thënë Vuçiç.
