Spanja është bërë skuadra e radhës që kualifikohet në 8 më të mirat e këtij Kampionati Europian, në atë që ka qenë deri tani ndeshja me dramatike.
Plot 9 gola u shënuan nga Spanja dhe Kroacia, teksa ndeshja u nda vetëm në barazim 3-3 në kohën e rregullt. Ishte Spanja ajo që ia doli të menaxhonte më mirë kohën shtesë duke shënuar 2 gola brenda një kohë mjaft të shkurtër.
Goli i parë ishte mjaft tronditës për spanjollët, teksa portieri Simon bëri një gafë të pafalshme duke mos arritur të kontrollonte topin e kaluar nga shoku i skuadrës dhe duke kaluar kështu kroatët në avantazh. Po ishte heroi i ndeshjeve të fundit për Spanjën, Pablo Sarabia ai që vendosi barazpeshën me golin e tij.
Spanjollët dominuan takimin dhe dukej se gjithçka do të ishte e lehtë për ta, kur edhe Cesar Azpiliqueta shënoi golin e tij të parë për fanellën e kombëtares. Spanja kaloi në avantazh për herë të tretë me Ferran Tores dhe këtu u duk se gjithçka ishte e mbyllur. Por Kroacia nuk u dorëzua lehtë. Dy gola të shpejtë me Orsic dhe Pasalic pak para përfundimit të kohës së rregullt, përmbysën gjithë parashikimet e Spanjës.
Alavaro Morata, atë që nuk e bëri në kohën e rregullt duke humbur disa raste, e bëri në kohën shtesë duke shënuar golin e katërt për “Furia Roja”. Mikel Oyarzabal i vuri vulën takimit duke shënuar golin e pestë që i çon spanjollët në çerekfinale. Më tej do të përballen me fituesin e ndeshjes Francë-Zvicër.
