“Euro2020” vijon rrugëtimin dhe sot, janë programuar tri sfidat e radhës në grupe. Pasi Anglia triumfoi ditën e djeshme kundër Kroacisë, në grupin D luhet edhe ndeshja tjetër prej orës 15:00, mes Çekisë dhe Skocisë. Të dyja ekipet do kërkojnë tre pikët, për të tentuar kalimin e grupit dhe pritet një ndeshje e ekuilibruar.
Më pas, në program janë duelet e grupit E, ku bën pjesë edhe Spanja, tre herë kampione e Europës. Iberikët luajnë prej orës 21:00 kundër Suedisë dhe pritet të kenë mungesa si Busquets dhe Llorente, kurse nga krahu tjetër, Svanberg dhe Kulusevski nuk aktivizohen dot, sepse kanë rezultuar pozitivë me COVID-19.
Ky Europian, ka qenë shumë më ndryshe se të gjithë të tjerët në histori. Kjo pasi fillimisht, nisi 1 vit me vonesë, për shkak të pandemisë së koronavirus. Megjithatë, nuk e humbi emrin “Euro2020”. Gjithashtu, gjatë këtij europiani ka pasur dhe dy ngjarje të frikshme.
Fillimisht, ylli i Danimarkës, Christian Eriksen, i trembi të gjithë në sfidën hapëse të skandinavëve kundër Finlandës, duke rënë në tokë pa ndjenja dhe duke i pushuar zemra. U desh ndihma e mjekëve për ta rikthyer në jetë. Ndërsa para sfidës mes Anglisë dhe Kroacisë, një tifoz britanik u rrëzua nga tribuna e “Wembley Stadium”, duke marrë dëmtime të rënda në trup.
