Është publikuar emri i kandidatit të parë për postin e drejtorit të Byrosë Kombëtare të Hetimit.
Bëhet fjalë për Artan Shkëmbin, kreun e njësisë “Forca e Ligjit”.
Shkëmbi ka pranuar për Top Channel që po përgatit dokumentacionin për t’iu përgjigjur thirrjes për t’u bërë pjesë e specialëve që do hetojnë korrupsionin dhe krimin e organizuar.
Sipas informacioneve jozyrtare, thuhet se në garë do hyjë edhe shefi i antiterrorit, Gledis Nano.
Më herët është përfolur se një ndër emrat që pritet të drejtojë strukturën e ngjashme me FBI është Adnand Xholi.
Pretendentët kanë afat deri në datën 30 janar për të dorëzuar formularët.
Bazuar në ligjin 95/2016 për funksionimin e strukturave anti-korrupsion neni 34, kreu i BKH duhet:
– të ketë formim profesion master,
-eksperiencë si prokuror apo Oficer i Policisë Gjyqësore si dhe
-eksperiencë së paku 5 vite me dosje të krimit të organizuar e korrupsionit.
Byroja Kombëtare e Hetimit do të jetë struktura mbështetëse e Prokurorisë së Posaçme Antikorrupsion, që do të hetojë korrupsionin në nivelet më të larta të zyrtarëve, por dhe veprat që janë kryer nga grupet e strukturuara kriminale.
Kjo strukturë do të përbëhet nga një drejtor dhe një ekip oficerësh të policisë gjyqësore.
