Kreu i Grupit Parlamentar të Partisë Socialiste, Taulant Balla i është përgjigjur deklaratës së sotme të Presidentit Ilir Meta , i cili kur u pyet për shkarkimin e tij tha “Zot fali se s’dinë ç ‘bëjnë”.
Balla nga qyteti i Elbasanit i është përgjigjur kësaj deklarate të bërë më herët nga Kreu i Shtetit, duke thënë se Zoti ti fali vetëm mëkate shpirtërore dhe jo penale, teksa theksoi se do të donte që në manastir të vinin edhe kolegët e Partisë Demokratike.
“Në hyrje të kësaj kishe që për mua është një objekt shumë i dashur, mund të them se kisha dhe zoti fal vetëm mëkat shpirtërore dhe jo ato penale. Kaq mund të them. Apeli im është se do të doja që këtu me mua të ishin edhe kolegët e PD-së, ftesa ime të vijnë ta vizitojnë Manastirin e Shën Joan Vladimirit. Këtu sot bashkë me ne janë besimtarë nga Mali i Zi dhe Serbia. Siç na bashkon ky shenjt, duhet të bashkohemi brenda politikës shqiptare dhe mbi të gjitha brenda këtij rajoni”, tha Taulant Balla nga Elbasani.
Reagimi i Ballës vjen pas deklaratave të bëra më herët nga Presidenti meta, i cili u pyet në lidhje me shkarkimin e tij, vendim që pritet të merret brenda 5 ditëve. Meta tha se nuk kishte bërë asnjë lutje të tillë, pasi ky vendim edhe nëse do të merret është nul, sa kohë që sipas tij Kuvendi është antikushtetues.
