Tragjedia që ndodhi në një spital Covidi në Rumani si pasojë e një zjarri të papritur, pati si hero një mjek i cili për pak sa nuk u sakrifikua për të shpëtuar pacientët e tij.
Nga zjarri i madh mjeku rumun pësoi djegie të rënda duke u përpjekur që të shpëtonte pacientët e shtruar me Covid-19. Si pasojë e plagëve të marra nga zjarri, mjeku është nisur nga qeveria rumune për në Belgjikë për mjekim më të specializuar.
Dr. Catalin Denciu, u quajt “hero” nga Kryeministri Ludovic Orban, i cili vlerësoi “guximin dhe shpirtin e tij të veçantë të sakrificës”, duke u përpjekur për të shpëtuar pacientët.
Dhjetë pacientë vdiqën nga zjarri në spitalin në Piatra Neamt të Shtunën.
Një hetim ka nisur se si shpërtheu zjarri vdekjeprurës në njësinë e kujdesit intensiv të spitalit publik. Zjarri u përhap gjithashtu në një dhomë ngjitur.
Disa raporte thonë se, një pajisje mjekësore ka marrë flakë, duke ndezur një bombolë oksigjeni aty pranë. Zyrtarët rajonalë thonë se njësia u zhvendos nga kati i tretë i spitalit në të dytin pa njoftim zyrtar.
Shtatë burra dhe tre gra, të moshës midis 67 dhe 86 vjeç, vdiqën në zjarr. Gjashtë pacientë të tjerë Covid-19 të plagosur në zjarr, u transferuan në një spital tjetër në qytetin Iasi.
Dr. Denciu u transferua në spitalin ushtarak “Mbretëresha Astrid e Belgjikës” pasi ishte dërguar në Bukuresht, për djegie të shkallës së dytë e të tretë në 40% të trupit të tij, thanë zyrtarët.
Presidenti rumun Klaus Iohannis, e quajti atë një “tragjedi të madhe” dhe tha se, ishte e rëndësishme të zbulohej se çfarë kishte ndodhur “për të shmangur situata të ngjashme në të ardhmen”.
Rumania ka raportuar më shumë se 360,000 raste të koronavirusit që nga fillimi i pandemisë dhe gati 9,000 vdekje.
Gati 13,000 pacientë Covid-19 ishin në spital nëpër të gjithë Rumaninë që nga e diela, përfshirë 1,169 në njësitë e kujdesit intensiv, raporton agjencia e lajmeve Reuters.
/GazetaReforma.com/
