Vatra e zjarrit në zonën e Drenovës, në Mallakastër, është përkeqësuar ndjeshëm gjatë orëve të fundit, duke dalë jashtë kontrollit pavarësisht ndërhyrjes nga ajri me dy helikopterë që kanë nisur operacionin që në orët e paradites.
Flakët, të nxitura nga era e fortë, janë përhapur me shpejtësi në një sipërfaqe të gjerë, duke rrezikuar seriozisht puset e naftës dhe tashmë po afrohen edhe pranë zonave të banuara.
Në terren po punojnë me intensitet shërbimet zjarrfikëse, forcat e ushtrisë dhe ekipet e emergjencave civile, ndërsa janë kërkuar përforcime shtesë nga qytete të tjera për të ndihmuar në përballimin e situatës alarmante.
