“O Muçi, ku ta gjej faturën, e kam mbledhur në mal!”
Kjo fjali është bërë simbol i revoltës së tregtares Bardha, e cila është kthyer në një figurë virale në rrjetet sociale pas një përballjeje me inspektor Muçin në Sarandë.
Inspektori, në zbatim të një urdhri të lëshuar nga kryeministri Edi Rama, i kërkoi Bardhës faturë për rigonin që shiste, një kërkesë që ajo e cilësoi absurde, pasi produktin e kishte mbledhur vetë në malet e zonës.
“Jam tregtare që prej vitit 1990. Këtë punë e nisëm me prindërit e mi, fillimisht me karrocë dhe më pas me makinë. Sot punoj e vetme, sepse prindërit nuk jetojnë më, ndërsa të dy vëllezërit kanë pësuar infarkt. Kjo punë më mban gjallë. Kam pasur oferta për të punuar në biznese private, por unë dua këtë punë. Nuk kam asnjë shqetësim shëndetësor, jam e fortë”, u shpreh Bardha.
Sa i përket kërkesës për faturë, ajo thekson absurditetin e situatës: “Të më kërkosh kupon për rigon që e kam mbledhur vetë në mal, është barrë e rëndë. Ku të marr unë faturë? Nuk kam kujt t’i kërkoj certifikatë apo dokument. Mali të jep gjë të pastër dhe të sigurt.”
Përballë kërkesës së qeverisë dhe mungesës së një rruge të qartë për të formalizuar një aktivitet të tillë, Bardha thotë se nuk mori asnjë shpjegim: “As inspektori nuk më tha se si duhet të veproj. E nëse ka një pyetje për Edi Ramën, është kjo: ‘Më trego një formulë, një model. Më thuaj çfarë duhet të bëj’.”
