Në Gjykatën e Posaçme Kundër Korrupsionit dhe Krimit të Organizuar është zhvilluar këtë të hënë seanca gjyqësore për çështjen e rrëmbimit dhe zhdukjes së Jan Prengës.
I pandehuri Dritan Rexhepi nuk ishte i pranishëm në sallë, për shkak të vonesave në transferimin e tij nga paraburgimi i Fierit drejt paraburgimit 313 në Tiranë, sipas deklaratës së përfaqësueses së tij ligjore.
Avokatja e Rexhepit kërkoi nga gjykata që seancat e ardhshme të mos caktohen ditën e hënë dhe të premte, për të shmangur vonesat në transport.
Gjatë seancës, Prokuroria e Posaçme paraqiti prova shkresore me një volum prej 13 faqesh, ku përfshihej edhe akti i këqyrjes së vendit të ngjarjes.
Ky akt konfirmon se viktima është Jan Prenga, bazuar në analizat e ADN-së, ku njollat e gjakut të gjetura janë krahasuar me ADN-në e nënës së tij, duke rezultuar të përputhshme.
Po ashtu, SPAK dorëzoi prova filmike të siguruara nga biznese të ndryshme, të cilat dokumentojnë ndjekjen e viktimës për disa ditë para rrëmbimit. Pamjet tregojnë se më 15, 16 dhe 17 janar, një automjet i tipit Land Rover, i dyshuar se u përdor nga autorët, kishte ndjekur lëvizjet e Prengës.
Procesi gjyqësor për këtë çështje do të vijojë në ditët në vijim, ndërsa SPAK pritet të prezantojë prova të tjera mbi ngjarjen.
