Presidenti i Serbisë, Aleksandar Vuçiç, ka thelluar bashkëpunimin me Hungarinë, duke shprehur ambicien për krijimin e një aleance apo pakti ushtarak mes dy vendeve. Menjëherë pas tij, presidenti i Republikës Sërpska në Bosnje e Hercegovinë, Millorad Dodik, deklaroi se ky entitet synon të përfshihet në një marrëveshje të ngjashme me Beogradin dhe Budapestin.
Hungaria, anëtare e NATO-s, nuk ka dhënë asnjë reagim lidhur me këto plane, ashtu si edhe vetë Aleanca e Atlantikut të Veriut. Ndërkohë, më 1 prill, ministrat e Mbrojtjes të Serbisë dhe Hungarisë, Bratislav Gashiç dhe Kristof Szalay-Bobrovniczky, nënshkruan Planin e bashkëpunimit ushtarak për vitin 2025, që pason marrëveshjen strategjike të vitit 2023. Dokumenti përfshin aktivitete të përbashkëta në fushën e mbrojtjes.
Vuçiç u shpreh se ai dhe kryeministri hungarez, Viktor Orban, janë të vendosur të avancojnë bashkëpunimin ushtarak, duke e lidhur këtë zhvillim me situatën aktuale në Evropë dhe në botë.
Këto lëvizje ndodhin në një kohë kur Kroacia, Shqipëria dhe Kosova kanë nënshkruar një marrëveshje për bashkëpunim në fushën e sigurisë dhe mbrojtjes. Beogradi e ka dënuar këtë akt si provokim dhe kërcënim për stabilitetin rajonal.
Në Serbi po vazhdojnë protestat masive, të udhëhequra nga studentët, pas një incidenti tragjik në Novi Sad ku humbën jetën 16 persona. Ndërkohë, Dodik përballet me një urdhër arresti në Bosnje për shkak të veprimeve të qeverisë së Republikës Sërpska që shkelin rendin kushtetues dhe rrisin tensionet separatiste në vend.
Idetë për një aleancë të re ushtarake mes Serbisë dhe Hungarisë kanë dalë në dritë rreth dhjetë ditë pas marrëveshjes mes Kroacisë, Shqipërisë dhe Kosovës, duke e vendosur këtë zhvillim në një kontekst rajonal të ndjeshëm dhe të tensionuar.
