Janë zbuluar detaje të reja lidhur me vrasjen e 43-vjeçarit shqiptar, Vladimir Topjana, në Itali. Ngjarja e rëndë dyshohet të ketë lidhje me konflikte për çështje pronësie.
Topjana u ekzekutua me armë zjarri mbrëmjen e së dielës, përpara një lokali në Fontanafredda, nga 34-vjeçari Rogert Shota.
Shota u arrestua, së bashku me babain e tij, Pren Shota, i cili ndodhej në makinë gjatë ngjarjes.
Sipas hetimeve, 43-vjeçari kishte dalë me djalin 17-vjeçar për të parë ndeshjen Roma-Juventus. Gjatë një bisedë me një të afërm në parkingun e makinave, një makinë e bardhë iu afrua.
Ata filluan të debatonin dhe, papritur, një nga personat doli nga makina, nxori armën dhe qëlloi Vladimir Topjanën në kokë.
Autori, pas krimit, tentoi të arratisej, por u kap më vonë nga policia. Brenda mjetit të tij u gjet një armë Beretta 7.65, e cila kishte qenë e vjedhur që nga gushti i vitit të kaluar në Bagnocavallo, në provincën e Ravena.
