Detaje të reja janë zbuluar nga vdekja e 23 vjeçarit, Regis Runaj që u gjet i pa jetë mbrëmjen e 29 korrikut “Emin Matraxhiu” në afërsi të varrezave në Elbasan. Dyshohet se 23 vjecari Runaj është rrëmbyer dhe më pas vrarë në vendin ku u gjet nga policia.
Burime pranë grupit hetimor, sqaruan për ABC News, se në afërsi të zonës ku u gjet trupi i të riut, janë fiksuar shenjat e frenimit të një makine. Kjo gjë e çon policinë në dyshimet se Runaj të jetë marrë me makinë nga një vend ende i pa përcaktuar qartë, duke u çuar deri në lagjen “Emin Matraxhiu”.
Ndërkohë për të zbardhur më shumë detaje rreth këtij krimit makabër, policia ka kontrolluar edhe celularin e viktimës, në të cilin janë përfituar numrat e personave të fundit që 23 vjeçari ka biseduar.
Gjithashtu të paktën tre persona po verifikohen për të zbuluar nëse ndonjëri prej tyre ka telefonuar qëllimisht Regis Runajn për ta nxjerrë në pritë ose jo. Kjo pasi tre telefonatat përkojnë të jenë bërë me orarin kur mendohet të jetë vrarë i riu. Dyshohet se vrasja e ka lidhje me ekzekutimin e Emiljano Ramazanit, të ndodhur më 20 korrik në po të njëjtin qytet pasi mes tyre ka patur lidhje miqësie. Po kështu, dyshimi kryesore për vrasjen e 23-vjeçarit, ngelet prishja e pazareve të drogës, apo konflikteve për ndarjen e territorit ashtu sic ndodhi edhe me ‘Rramanin’.
Nga ana tjetër, hetuesit dyshojnë se Runaj është vrarë nga grupi rival për shkak se mund të ketë pasur ndonjë informacion rreth konflikteve që ka pasur Emiljano Ramazani, apo dijeni rreth autorëve që ekzekutuan atë. Regis Runaj u masakrua me mbi 25 thika në trup, në zemër, fyt, fytyrë dhe qafë.