Presidentja e Komisionit Europian, Ursula von der Leyen, do të vijë në Shqipëri më 23 tetor.
Sipas njoftimit zyrtar të Komisionit Europian, Von der Leyen do të takohet me Kryeministrin Edi Rama në të njëjtën ditë, ndërsa do të mbajë një fjalim në ceremoninë e përurimit të Kolegjit të Europës në Tiranë.
Një ditë më pas, Von der Leyen do të zhvillojë edhe një takim me Presidentin Bajram Begaj.
Së fundmi, Shqipëria ka qenë temë diskutimesh edhe në tryezat e punës së Bashkimit Europian, për shkak të nisjes së zbatimit të marrëveshjes Rama-Meloni për dërgimin e azilkërkuesve nga vendet e treta në Shëngjin.
Vetë Von der Leyen ka shprehur mbështetjen e saj për këtë marrëveshje, ndërsa Spanja dhe Franca kanë treguar rezerva ndaj saj.
