Vrasja e Indrit Çelës ende ka mbetur e pazgjidhur dhe ky fakt ka shqetësuar jo pak familjarët e tij, mes të cilëve edhe motra e 26-vjeçarit, që qëndron në Greqi.
Eranda nëpërmjet emisionit “Me zemër të hapur”, ka kërkuar drejtësi për vëllanë e saj.
Ajo ka akuzuar autoritetet shqiptare se kanë ndërprerë kërkimet.
Motra e Indritit është shprehur e pasigurt, pasi autorët mund të jenë në Greqi.
Sipas saj, kriminelët bredhin të lirë, ndërsa Indriti ha dhe.
Ndër të tjera, ajo ka kërkuar që vrasësit të përjetojnë të njëjtën dhimbje si prindërit e saj për Indritin, të cilin e kishin si dritën e syrit.
“Ai babai im që ka ardhur aty ka shumë të drejtë. Ai shteti që jetojmë ne i padrejtë, i pasigurt. Ne mund të ikim të tërë si puna e vëllait tim. Ku do gjejmë ne drejtësi. Ku është ai KM që nuk del të flasë. Dua t’i lutem të gjithëve që çështja e vëllait tim të shkojë deri në fund. Siç i ka pikuar gjaku atij vëllai tim aty, ashtu do i pikojë dhe atyre. Unë jam në Greqi, dhe ata janë në Greqi, jam e pasigurt. Ai babai im mezi e ka rritur. Unë atë vëlla kisha. Vëllai im të shkojë në punë dhe të vijë i vdekur dhe këtë nuk e prisja. Nuk kam kurajë. Vëllai im ha dhe, kriminelët bredhin rrugëve. Si mund të jetojmë ne. Ku ta gjejë kurajën babai im dhe nëna ime, një dritë syri kishin. E çuan djalin në Tiranë te punonte për bukën e gojës. Atë dhimbje që po heq babai im, ta heqin dhe ata kriminelë. Dua që shteti të bëjë drejtësi. Shteti nuk po bën kërkime. Si ka mundësi që në kaq ditë që vëllai im nuk është më në jetë, askush nuk po kërkon më”, u shpreh Eranda.
