Presidenti Ilir Meta reagoi ditën e sotme në lidhje me prishjen e Teatrit Kombëtar, duke i bërë thirrje autoriteteve shtetërore, që të mos e cënojnë godinën, pasi në Gjykatën Kushtetuese aktualisht ka një padi për këtë çështje.
Ndërkohë kreu i Bashkisë së Tiranës, Erion Veliaj, i ka kthyer përgjigje Metës për Teatrtin, gjatë inspektimit për zgjerimin e ujësjellësit në Bovillë.
Veliaj është shprehur se artistët mund të qëndrojnë te ajo godinë, por nuk kanë përse mbajnë peng kostumet dhe sendet me vlerë, të cilat po i ha miu dhe mola.
“Tirana do të ketë Teatër të ri. Nuk mund të jenë më të zgjuar sportistët, turistët që shohin Kalanë dhe të jetë artistët që duhet të rrinë në një kolibe tallashi. Për projektin do të flasim në vjeshtë. Le të rrinë te kasollja prej kashte,m te kolibja e fashizmit, por kostumet nuk kanë pse i mbajnë peng aty. Nuk ka arsye përse miu të ushqehet me zërin e artistëve. Minimalisht edhe nëse presidenti është realisht i interesuar mos ti lërë të gjitha sendet me vlerë ti halë miu dhe mola. Teatri është institucion, kështu që arkiva, sendet me vlerë, duhet të shkojnë atje ku vlejnë” tha Veliaj.
Veliaj akuzoi presidentin se po e përdor Teatrin si alibi, ndërsa i bën thirrje që të mos bëhet brigadier komunaleje.
Bobinat, filmimet, skenografitë të largohen. Kur të vijë koha le të flasim për projektin. Mbreti është lakuriq, por thirrja ime është që siç kemi ujësjellës të ri, stadium të ri, pazar të ri, duhet të kemi edhe teatër të ri. Kultura e zaptimit nuk është për ne. Tetarin e tentuam ta bëjmë me lekët e tjetrit, por meqenëse kërkuan mjete shtese, lam privatin dhe u bëmë me artistët. Tetarin do ta paguajmë me këste, ashtu si ujësjellësi. Ka ngelur një pakicë e vogël, të gjithë ushtarë të një partie të vogël, që s’kanë alibi, por s’duan asnjë punë në Tiranë. E urrejnë faktin që Shqipëria po bën përpara. Këta çfarë bënë kur e kishin bashkinë?! Dhe presidenti ka mbetur pa alibi. E bëmë ligjin si e donte komisioni europian. I them presidentit rri me kushtetutën, nuk ke asnjë arsye të meresh edhe me Astirin, por mos të përfundo si atje, bëni si them unë. Mungesa e Gjykatës Kushtetuese është aq pa lidhje me Teatrin sa ç’ka Partia Demokratike me demokracinë. Presidenti të mos bëhet brigadier komuneleje. O të bëhet me Robert Ndrenikën që ka lozur në atë skenë, ose me Lulzim Bashën që ka lozur në një tjetër skenë,”-tha ndër të tjera Erion Veliaj.
Kujtojmë këtu se vetëm pak ditë më parë artistët paditën në SPAK, Veliajn dhe nënkryetarin e Bashkisë së Tiranës, Arbjan Maznikun.
Artistët dhe shoqëria civile akuzojnë kreun e Bashkisë së Tiranës, se kërkon të shembë Teatrin dhe një pjesë të pronës shtetërore, do t’ja kalojë privatit.
