Ministrja e Shëndetësisë dhe Mbrojtjes Sociale, me anë të një postimi në rrjetet sociale ka reaguar pas lajmit se varianti “Delta” i virusit po qarkullon në vendin tonë. Manastirliu iu ka bërë thirrje qytetarëve që të respektojnë me rigorozitet masat parandaluese, si dhe izolim të menjëhershëm në rast dyshimi dhe konfirmimi të virusit.
Gjithashtu ajo iu bën apel qytetarëve që të vaksinohen, pasi sipas saj është e vetmja “armë”, për të frenuar përhapjen e virusit në vend.
“Konfirmimi i prezencës së variantit Delta në Shqipëri nga laboratori i referencës Charite në Berlin, kërkon nga të gjithë respektim rigoroz të masave parandaluese, izolim të menjëhershëm në rast dyshimi dhe konfirmimi të virusit #Covid19 dhe mbi të gjitha VAKSINIM • VAKSINIM • VAKSINIM, si arma më e fuqishme për të frenuar përhapjen e virusit dhe për të shpëtuar jetë!
#VaksinohuSOT
#KohaËshtëTANI
#ShqipëriaBuzëqesh”, ka shkruar në postim ministrja e Shëndetësisë, Ogerta Manastirliu.
Kujtojmë se pak më parë Ministria e Shëndetësisë konfirmoi zyrtarisht se në Shqipëri ka mbërritur varianti “Delta” i koronavirusit. Me anë të një njoftimi, Ministria thotë se nga kampionet e dërguara në Institutin e Virologjisë – Charite në Berlin të Gjermanisë, ku u krye analiza e thellë gjenetike e sekuencimit të gjenomës së virusit në këto kampione, rezultoi të ishte prezent ky variant.
Konfirmimi i qarkullimit të variantit Delta në Shqipëri, thote ministria, përkon edhe me rritjen e infektimeve në 2 javët e fundit në vendin tonë.
