Ndërsa kryeministri Edi Rama përzgjedh mes të moshuarve personalitete, ambasada greke në Shqipëri ka dhuruar teste falas për të gjithë të moshuarit mbi 80 vjeç në bashkinë e Finiqit.
Procesi i testimit do të kryhet në qendrën e fshatrave, ku janë vendosur dhe autoambulancat. Do të vijohet fillimisht me bërjen e testit dhe më pas ata që do të dalin pozitiv do të ndiqen më tej si rast.
Anëtarët e minoriteteve janë gjithashtu në listat e vaksinimit kundër COVID edhe në Greqi, por duhet të paraqiten në qendrat e vaksinimit në shtetin fqinj për të marrë dozën.
Ndërkohë që shteti fqinj e ka një plan të gatshëm dhe për minoritetet, në Shqipëri plani kombëtar i vaksinimit është ende i paqartë.
U tha se pas mjekëve do të vaksinoheshin të gjithë të moshuarit mbi 80 vjeç e më pas do të vijohej me mësuesit e policët, si target-grupet më të rrezikuara.
Por deri më tani janë vaksinuar një përqindje shumë e vogël e mjekëve dhe mes të moshuarve u bë ndarja në personalitete ose jo. Ndërkohë mësuesit dhe policët nuk kanë nisur ende vaksinimin në asnjë prej tyre.
Sa i përket sasisë së vaksinave deri më tani numërohen rreth 9140 doza që mjaftojnë për të vaksinuar vetëm 4570 persona me dy dozat e nevojshme.
Plani i paraqitur deri tani nga qeveria është që brenda 14 muajve të mbarojë vaksinimi i grupeve më të rrezikuara, dhe sipas kryeministrit Edi Rama e gjitha kjo varet nga numri i vaksinave që janë porositur por që nuk dihet ende se kur do të vijnë.
