Aksidentet e shumta të ndodhura sidomos që prej fillimit të vitit, ku pothuajse nuk ka asnjë ditë pa një ngjarje të rëndë, ka bërë që edhe kompanitë e sigurimeve të marrin masat e tyre.
Tashmë duke nisur që prej ditës së sotme, në sistemin bonos-malus do të mbahet edhe një historik për dëmet që drejtuesit e mjeteve kanë shkaktuar. Kjo vjen si Udhëzim i Autoritetit të Mbikëqyrjes Financiare, i cili parashikon që për një vit do të krijohet historiku i dëmeve të drejtuesve të mjeteve, ndërsa zbatimi i tarifave mbi bazën e këtij sistemi do të nisë me 1 prill 2020.
Konkretisht çfarë do të ndodhë me historikun?
Për të gjithë drejtuesit e automjeteve, historiku do të përcaktojë numrin e aksidenteve që është bërë brenda një vitit dhe sa më shumë dëmtime aq më i lartë do të jetë çmimi i sigurimit.
Kjo ulje tarife do të shërbejë edhe për makinat me fuqi të ulët motorike.
Sistemi bonus-malus për çmimet e siguracioneve parashikon 18 kategori ku për secilën ka një koeficient.
Sa më i ulët koeficienti aq më pak do paguhet, dhe sa më i lartë aq më shumë do jetë tarifa për t’u paguar.
Për ata drejtues që nuk kanë bërë asnjë aksident, koeficienti është 0.5 dhe vjen në rritje për ata që kanë bërë aksidente duke shkuar në maksimum në koeficientin 2.
