Pasi Europa u kthye në vatrën e Covid-19, të gjitha shtetet anuluan fluturimet, teksa Komisioni Europian vendosi të mbyllte kufijtë duke mos lejuar lëvizjet brenda zonës Schengen.
Mirëpo, teksa në disa vende situata duket se po shkon drejt përmirësimit, shumë persona po pyesin nëse fluturimet do rikthehen.
Mbrëmjen e sotme, në një lidhje me Skype për ‘Opinion’, ministrja e Infrastrukturës, Belinda Balluku, ka folur më gjerësisht rreth kësaj çështjeje, duke bërë me dije edhe hipotezat e mundshme rreth fluturimeve ajrore në të ardhmen, pasi aktualisht nuk ka asnjë vendim.
Balluku deklaroi se hapja e kufijve nuk varet nga një qeveri e vetme, por nga vendimi që do merret në bashkëpunim me të gjitha vendet, teksa shtoi se BE parashikon hapjen e fluturimeve në qershor vetëm brenda shteteve, pra fluturime lokale, kurse fluturimet ndërkombëtare fatkeqësisht mund të rinisin vetëm në shtator.
“Kjo nuk është në dorën e qeverisë shqiptare apo të ndonjë qeverie fqinje pasi duhet të ketë një koordinim të përbashkët me të gjitha shtetet. Ka një vendim paraprak të Bashkimit Europian për datën 15 qershor, por nuk është definitiv. Gjasat më të mëdha janë që lëvizja të jetë lokale dhe të ketë një hapje veetëm në shtator. Fatkeqësisht ky nuk është një lajm i mirë, por kështu qëndron situata për momentin.”
Megjithatë, rinisja e fluturimeve nuk do jetë më si më parë, nga vetë fakti se kompanitë e aviacionit janë goditur fort nga pandemia, dhe pritet një rritje e çmimit të biletave.
Ministrja u shpreh se protokollet e reja shëndetësore që do vihen në fuqi do kërkojnë që karriget e mesit të mos përdoren më, për të ruajtur distancën mes personave që udhëtojnë, mirëpo kjo do të sjellë 30% më pak efiçencë financiare, çka përkthehet në 30% më shumë kosto të biletës.
Po ashtu, protokollet do rrisin edhe orët e qëndrimit nëpër aeroporte, sepse do bëhet kontrolli i personave që udhëtojnë, duke iu përshtatur rregullave të pandemisë.
“Për të thënë të drejtën ditët e fundit jam marrë me këtë çështje dhe po punojmë për kompanitë e aviacionit, për të cilat rimëkëmbja do jetë e vështirë për disa arsye. Protokollet e reja shëndetësore që do vihen në fuqi do kërkojnë që brenda avionit karriget e mesit të mos përdoren më. Kjo do të sjellë 30% më pak efiçencë financiare, çka përkthehet në 30% më shumë kosto të biletës. Ndërkohë, kur kjo industri të rikthehet çmimet e karburanteve do jenë shumë të ulura, pasi siç dihet çmimet janë në nivelin historik më të ulët. Pra, është një situatë shumë për tu analizuar. Protokollet do rrisin kostot e kompanive dhe orët e qëndrimit nëpër aeroporte.”
Ministrja përmendi shembullin e Austrisë, e cila po mendon që kur të rinisë udhëtimet, të detyrojë qytetarët të bëjnë testin e Covid-19 në aeroport, me një kosto prej 250 eurosh dhe nëse ata rezultojnë negativ mund të vijojnë udhëtimin, në të kundërt jo.
“ Aeroporti i Vienës sot ka nisur testimin e pacientëve që duan të udhëtojnë me një kosto prej 250 eurosh, përvëç biletës. Që do të thotë, ti futesh në avion, për 15 minuta duhet të bësh testin. Nëse del negativ vazhdon procedurat e udhëtimit, në të kundërt rikthehesh në shtëpi. Ka shumë protokolle që po sugjerohen, por unë besoj se të gjithë shtetet do mundohen të balancojnë humbjet e aviacionit. Pra, është në një moment shumë kritik e të gjitha shtetet po mundohet të gjithë së bashku të dizenjojnë një protokoll.”
Megjithatë, çdo gjë mbetet në kuadrin e parashikimeve dhe tezave të mundshme, sepse deri tani nuk është marrë një vendim zyrtar se çfarë do ndodhë me fluturimet.
