Presidenti i Republikës së Shqipërisë mund të humbasë edhe më shumë kompetenca, të cilat pritet t’i kalojnë Kuvendit, nëse kryeministri Edi Rama e kthen në nismë ligjore synimin e bërë publik sot.
Teksa po fliste për vendimin e mazhorancës për tërheqjen nga shkarkimi i presidentit Meta, Rama njoftoi se në të ardhmen do të merren masa për kufizimin e kompetencave të institucionit të Presidentit.
Në lidhje me raportin e Komisionit të Venecias, Rama tha se u gjetën shkelje të Metës në anulimin e zgjedhjeve lokale të 30 qershorit, por ato nuk ishin të mjaftueshme për shkarkimin e tij.
“Mund t’ju informoj mbi raportin që nuk e keni lexuar se Komisioni i Venecias ka shënuar një sërë shkeljes të Presidentit. Janë të shkruara e zeza mbi të bardhë shkeljet e Metës që flasin qartë për drejtësinë e vendimit tonë për t’ja nënshtruar këto shkelje një Komisioni Hetimor që ka bërë një punë voluminoze. Bazuar në të gjithë analizën e raportit të Komisionit të Venecias në veprimtarinë e Presidentit të Republikës e kemi parë të arsyeshme për të hyrë në këtë proces. Edhe në këtë rast është një tjetër mundësi për të parë qartë dallimin mes nesh dhe gjithçkaje që thuhet gabimisht për ne. Ne e kemi lexuar me shumë vëmendje raportin e Komisionit të Venecias dhe nuk e kemi konsideruar si aneks të punës sonë, por si pikë referimi. Komisioni i Venecias thotë se shkeljet e bëra nuk janë mjaftueshmërisht të rënda për të shkarkuar Presidentin atëherë kemi parë me shumë vëmendje konstatimet që nuk na rekomandojnë të shkarkojmë Presidentin, por të marrim masa për të ardhmen që të kufizojmë Presidentin”, deklaroi Rama nga foltorja e Kuvendit.