Kol Ndoji, 59 vjeç nga Rrësheni, ka kallëzuar në polici një ngjarje të rëndë dhune që sipas tij ka ndodhur mëngjesin e sotëm pranë tregut të qytetit.
Ai pretendon se është sulmuar fizikisht nga dy persona, njëri prej të cilëve ka qenë i përfshirë në një konflikt të mëparshëm gjatë një proteste kundër ndërtimit të HEC-eve.
Në dëshminë e dhënë për autoritetet, Ndoji tregon se rreth orës 09:00, ndërsa kishte përfunduar blerjet në një lokal pranë tregut dhe po largohej, u përball me dy burra.
Njërin prej tyre e identifikon vetëm me mbiemrin Prenga, nga fshati Mashtrekor i njësisë administrative Orosh, ndërsa tjetri është i panjohur për të.
Ai kujton se me shtetasin Prenga ishte përplasur më herët, më 15 prill 2025, në fshatin Arrëz gjatë një proteste kundër kompanisë “Shperdhaza” që po ndërtonte hidrocentrale në zonë. Gjatë asaj ngjarjeje, Prenga i kishte bllokuar rrugën me një fuoristradë me drita sinjalizuese si ato të policisë.
Sipas Ndojit, në atë moment i kishte vendosur dorën në qafë dhe i kishte kërkuar të lëvizte automjetin, ndërsa personi në fjalë e kishte paralajmëruar: “Do të dalë punë me mua.”
Sot, pretendon Ndoji, ky individ është rikthyer për hakmarrje: “Erdhi dhe më tha: ‘A më njeh kush jam? Të thashë se do të dilte punë me mua’, dhe më pas më goditën të dy me grushte. Arrita të largohem me vrap, por më ndoqën me makinë. Kur zbritën dhe më dolën përpara duke kaluar një rrethim shtëpie, nisi një përleshje tjetër. Më goditën me gurë dhe edhe unë u vetëmbrojta me gurë. Gjatë sherrit, Prenga më tha: ‘Pse, çfarë më di mua ti? Unë jam i policisë’ dhe më pas u larguan.”
Policia ka nisur hetimet për ngjarjen dhe po verifikon pretendimet e 59-vjeçarit. Deri tani nuk ka një reagim zyrtar për identitetin apo funksionin e personave të përmendur në kallëzim.
