Në situatën kur Turqia sapo është prekur nga një tërmet i fuqishëm dhe Shqipëria ende vuan pasojat e tërmetit të 26 nëntorit, një lajm aspak i mirë erdhi dje nga shteti turk.
Ministri i Brendshëm turk Suleyman Soylu paralajmëroi se vendi duhet të bëhet gati për një tërmet 7,5 ballë që pritet të godasë Stambollin.
Po ashtu, president i Dhomës së Inxhinierëve Gjeologë, Engin Er, u shpreh se një tërmet me fuqi 7.6 ballë pritet të godasë në Silivri, pranë detit Marmara.
Sipas tij, lëkundja do jetë aq e fortë, sa do ndjehet deri në Itali dhe Austri.
Në këto kushte ky tërmet pritet të ndjehet edhe në Shqipëri.
Rreth kësaj ka folur sizmiologu Rrapo Ormeni, i cili ishte i ftuar në 360°.
Ormeni tha se vendi ynë është mbi 2500 km larg, kjo bën që energjia të shuhet dhe ndjeshmëria në vendin tonë mund të jetë deri në 5-6 ballë.
Sipas Ormenit tërmetet deri në 6 ballë nuk janë dëmtues, por vetëm frikësues.
Rrapo Ormeni: Është një tërmet me magnitudë 7.5 rihter, që i thonë mbi 10 ballë. Kjo do të thotë që shkakton dëmtime të mëdha. Vetëm godinat e dëmtuara fort nuk i rezistojnë. Por Shqipëria është rreth 2500 km larg, ai këtu do të vijë 5-6 ballë. Nuk shkakton asgjë tek ne. Pragu kur fillojnë dëmtimet është 7 ballë. 6 ballë nuk ka efekt dëmtues, 5 ballë është vetëm i frikshëm që ndihet nga njerëzit. Që nga epiqendra që është në Turqi këtu vjen i ulët. Ai do të ketë efektin e ndjeshmërisë, por jo efekt dëmtues. Energjia do shuhet.
Kujtojmë se tërmeti i 26 nëntorit shkaktoi 51 viktima, plagosi qindra të tjerë dhe la mijëra të pastrehë.
