Një turist ka filmuar një kamionçinë të mbingarkuar me barë për bagëtinë në rrugët e qytetit të Korçës. Menjëherë ai ka sinjalizuar policinë pas një situate të tillë anormale.
“Dua të sinjalizoj një sjellje anormale, mjeti në kthesën e parë mund të përmbyset duke dëmtuar veten dhe përdorues të tjerë të rrugës. Ndërhyni ju lutem…”- ka shkruar turisti
Policia ka marrë menjëherë masat, pasi ka identifikuar drejtuesin e mjetit dhe e ka gjobitur atë. Ndër të tjera në njoftim, polica ka theksuar se përditë e më shumë qytetarët shqiptarë bashkëpunojnë e besojnë tek policia duke adresuar shqetësimet dhe paligjshmëritë.
Njoftimi i policisë:
Korçë
Kontributi për sigurinë e jetës në rrugë, detyrë qytetare.
Përditë e më shumë qytetarët shqiptarë bashkëpunojnë e besojnë tek policia duke adresuar shqetësimet dhe paligjshmërinë. Mes tyre edhe shtetas të huaj me qëndrim të përkohshëm dhe me aktivitet në Shqipëri, apo turistë bëhen partnerë me Policinë e Shtetit.
Ata nuk mbeten vetëm në konstatime apo në bërjen e fotove e të videove.
Komisariati Dixhital, adresat zyrtare të Policisë së Shetit në rrjetet sociale u japin mundësinë që të perdorin teknologjinë dixhitale për të sinjalizuar anomalitë dhe sjelljet e rrezikshme në rrugë urbane, inter-urbane apo rurale të drejtuesve të mjeteve.
Një qytetar i huaj, vizitor në vendin tonë pas videos së dërguar shkruan: “Dua të sinjalizoj një sjellje anormale, mjeti në kthesën e parë mund të përmbyset duke dëmtuar veten dhe përdorues të tjerë të rrugës. Ndërhyni ju lutem…”
Policia Rrugore duke e falënderuar “Qytetarin e javës” për sigurinë rrugore, po publikon masën administrative ndaj drejtuesit të mjetit kundravajtës.
Posta Shqiptare ia dërgoi gjobën drejtuesit të mjetit në adresë.
Së bashku mund ta bëjmë rrugën më të sigurtë!
Qellimi është që çdo drejtues mjeti të mbërrijë e/i sigurtë në destinacion.
