Një aksident tragjik me pasoja fatale ka ndodhur në qytetin e Malagës, ku katër persona, përfshirë një nën-inspektor të Policisë Kombëtare të Spanjës dhe tre të dyshuar shqiptarë, humbën jetën pas një përplasjeje frontale mes dy automjeteve.
Ngjarja nisi pas një tentative për grabitje në një farmaci në rrugën Lope de Rueda, në lagjen Puerto de la Torre. Tre persona, që dyshohet se janë pjesë e një grupi kriminal shqiptar të njohur për aktivitetin e tij, hynë me qëllim grabitjeje në farmaci, por u detyruan të largoheshin me shpejtësi pasi operacioni dështoi. Ata u larguan me një automjet me performancë të lartë, duke nxitur ndjekjen nga forcat e rendit.
Sipas agjencisë EFE, gjatë arratisë, grabitësit morën një kthesë të gabuar dhe përfunduan në krahun e kundërt të autostradës A-7, në drejtim të Torremolinos. Në këtë segment ndodhi edhe përplasja fatale me automjetin e një oficeri 48-vjeçar të Policisë Kombëtare, i cili nuk ishte përfshirë në ndjekje, por po kthehej në banesë pas turnit të natës. Përplasja ishte aq e fortë, saqë të dy automjetet shpërthyen në flakë.
Zjarrfikësit nga njësitë Churriana, Carretera de Cádiz dhe Martiricos ndërhynë menjëherë për të shuar zjarrin dhe për të nxjerrë trupat nga automjetet e djegura. Tre personat në makinën e grabitësve u gjetën të vdekur në vend, ndërsa nën-inspektori u nxor nga mjeti nga policët lokalë, por humbi jetën pak më vonë për shkak të plagëve të rënda.
Në vendngjarje mbërritën edhe Garda Civile, Policia Kombëtare dhe shërbimet emergjente mjekësore 061. Hetimet për këtë aksident të rëndë po drejtohen nga Departamenti i Trafikut i Gardës Civile.
Oficeri i ndjerë ishte baba i dy fëmijëve dhe kishte më shumë se dy dekada në shërbimin policor. Ngjarja ka tronditur opinionin publik në Spanjë, ndërsa autoritetet vendore kanë shprehur dhimbjen dhe ngushëllimet për familjen e tij.
