Platforma TikTok është zyrtarisht e bllokuar në Shqipëri, siç njoftoi kryeministri Edi Rama.
Megjithatë, sipas ekspertëve të IT-së, metoda e ndjekur për bllokimin e platformës nuk është më efiçentja.
Eksperti i teknologjisë, Erion Demiri, shpjegon se qeveria ka zgjedhur një mënyrë manuale për të ndaluar TikTok-un, duke bllokuar adresat individuale të shërbimit.
“Metoda më efektive do të ishte bllokimi përmes një liste të madhe adresash IP, të cilat ISP-të do të ishin të detyruara t’i ndalonin. Aktualisht, bllokimi po bëhet manualisht nga kompanitë e internetit, por kjo është një qasje më e vështirë dhe më pak efikase.
Platformat si TikTok i ndryshojnë vazhdimisht adresat e tyre, duke e kthyer këtë proces në një lojë pa fund,” shpjegon Demiri.
Ai gjithashtu thekson se TikTok do të vazhdojë të jetë i aksesueshëm për shumë përdorues edhe pa nevojën e një VPN-je.
Për ata që zgjedhin të përdorin VPN, procedura është e thjeshtë: një aplikacion falas lejon ndryshimin e adresës së përdoruesit, duke e bërë të duket sikur ai ndodhet në një vend tjetër, si Holanda.
Nëse ky bllokim do të funksionojë në planin afatgjatë mbetet ende për t’u parë, por për momentin duket se shumë përdorues shqiptarë e kanë gjetur rrugën për të hyrë sërish në TikTok.
