Sot në Tiranë me nismë të Akademisë së Shkencave, u mblodhën ekspertë dhe akademikë nga rajoni ku u diskutua ndër të tjera përpilimi i kodit të ri teknik për ndërtimet, në mënyrë që t’i rezistojnë forcës së tërmetit, ashtu siç e kanë gjithë vendet europiane.
Spiros Pavlidesi, profesori i gjeologjisë në Universitetin e Selanikut, i bëri thirrje qeverisë tonë të miratojë hartën e re sizmike pas tërmetit të 26 nëntorit.
Pavlidesi propozoi që Shqipëria mos t’i referohet vetëm eurokodeve por të përpilojë një kod të sajin siç ka bërë Greqia.
“Shqipëria është një nga vendet më sizmike të rajonit. Nuk mund të bëhen parashikime për tërmetet por në bazë të statistikave, çdo 30 vjet në Shqipëri ndodh një tërmet i fuqishëm. Duhet të ndërmerren hapa shkencore dhe ligjore në mënyrë që qëndrimet e reja të jenë të qëndrueshme. Ne në Greqi kemi kodet më të mira sepse ishin tërmetet ata që na përcaktuan kodet e reja. Sot kemi kodet greke dhe europiane, por në disa pjesë kodi grek është më i mirë. Harta sizmike dhe kodet ne i ndryshojmë çdo 5 vjet, në varësi të studimeve dhe rezultateve Akademia e shkencave dhe ekspertet e sizmologjisë po përgatitin hartën e re sizmike dhe propozimet për kodet e reja të ndërtimit.”, tha sizmologu Spyros Pavlides.
Tërmeti i 26 nëntorit, ishte nga më të fortët të 40 viteve të fundit.
Ai shkaktoi 51 viktima dhe la mijëra të pastrehë.
