Ditën e djeshme Prokuroria e Tiranës, thirri në ambientet e saj tre specialistë ndërtimi pas një kallëzimi të bërë ndaj tyre nga Aleanca për Mbrojtjen e Teatrit.
Vendimi për prishjen e godinës së Teatrit u mor pikërisht nga tre specialistët të cilët dolën në këtë konkluzion.
Ditën e sotme, Aleanca për Mbrojtjen e Teatrit i ka kërkuar SPAK arrestimin e Sandër Lleshajt, Ardi Veliut dhe Erion Veliajt.
Aleanca i akuzon për “tentativë vrasjeje të artistëve”, pasi këta të fundit ndodheshin ende në godinë në momentin kur nisi edhe shembja e Teatrit Kombëtar.
Edhe juristja Ardiana Kalaja është shprehur para mediave se tre zyrtarët duhet të arrestohen, pasi tre personat e akuzuar për tentativë vrasjeje mund të fshehin provat.
“Një grup nga qëndrestarët për mbrojtjen e Teatrit, kemi dorëzuar një kallëzim në SPAK për Sandër Lleshajn, Ardi Veliun dhe Erion Veliajn.
Sipas nesh ata akuzohen për veprën penale të vrasjes së mbetur në tentativë, kemi parashtruar të gjitha pretendimet tona, për dyshimin tonë të arsyeshëm se mund të manipulojnë provat dhe ti fshehin ato.
Për këtë ne kemi kërkuar arrestimin e këtyre personave, dhe kemi besim se SPAK do të nisë hetimet”, u shpreh juristja Ardiana Kalaja.
Për mediat është prononcuar edhe regjisori Robert Budina i cili tha se çështja do ndiqet deri në fund dhe shprehu besimin tek institucionet e drejtësisë që kanë rastin të thonë fjalën e tyre.
“Unë nuk jam jurist, por do të bëj gjithçka që kjo çështje të shkojë deri në fund, ajo që ne duam është të rikthejmë Tempullin e Teatrit aty ku ishte, dhe kjo çështje nëse është e nevojshme do të shkojmë deri në Parlamentin Europian.
Pamjet i panë të gjithë, kanë qarkulluar masivisht në media. Policia erdhi me armë, ndërkohë që unë, ne kemi protestuar për më shumë se dy vjet pa armë.
Ne gjatë dy viteve e tre muaj kemi dhënë shfaqje duke argëtuar publikun, e ndërsa forcat e policisë na vijnë për të shembur Teatrin duke na drejtuar armët në kokë”, u shpreh Budina.
