Një skandal ka ndodhur me të dhënat private të shqiptarëve ku janë publikuar pagat e mbi 637 mijë punonjësve publik e privat, krahas së cilës tregohet edhe numri i kartës së identiteti dhe vendi ku ata punojnë.
Kjo ka bërë që Prokuroria e Tiranës të nis menjëherë hetimet për Drejtorinë e Tatimeve nga dyshohet se mund të ketë rrjedhur informacioni. Lista e pagave, një dokument në formatin “excel” nisi të qarkullojë në “Whats App” duke përbërë një shkelje flagrante të dhënave personale të qytetarëve shqiptarë. Pas kësaj, u arrestuan katër persona.
Mësohet se të prangosurit janë dy specialistët e AKSHI-t Eni Qirjako dhe Andi Agaraj dhe dy shtetas të përfshirë në agjenci kredidhënëse dhe përmbarimore Klodian Sota dhe Endi Ikonomi. Ky i fundit është emri që lidhet me miliarderin rus Oleg Viktorovich Boyko, nga i cili dyshohet se është urdhëruar vjedhja dhe publikimi i pagave të rreth 700 mijë shqiptarëve. Ikonomi është tashmë I arrestuar nga policia dhe rezulton të ketë punuar për kompaninë e një bosit rus në Shqipëri, e quajtur Credit 2 All (Digital Finance International SHPK).
Mes personave të arrestuar është edhe Andi Agaraj. Ky i fundit, punonjësi i IT-së, specialist kompjuteri në zyrën e Tatimeve i nxori këto të dhëna duke ia dhënë dy përmbaruesve kundrejt 20-30 mijë lekëve. Emri i Andi Agaraj është mjaft i njohur në vendin tonë, ndërsa njihet si fotografi që theu tabunë dhe bëri një ekspozitë me foto nudo të femrave shqiptare. Madje, ai shkoi edhe më tej, duke bërë edhe një kalendar më femrat nudo në vitin 2020.
