Deputeti shqiptar i Luginës së Preshevës, Shaip Kamberi, së bashku me dy përfaqësues të Sanxhakut, Ahmedin Shkrijel dhe Selma Kuçeviç, kanë depozituar një rezolutë në Kuvendin e Serbisë për të dënuar gjenocidin në Srebrenicë. Rezoluta, e cila kërkon shpalljen e 11 korrikut si Ditën e Përkujtimit të Viktimave të Gjenocidit në Srebrenicë, synon të nderojë viktimat dhe të angazhohet për parandalimin e mizorive të ngjashme në të ardhmen.
“Bazuar në Rezolutën e Asamblesë së Përgjithshme të OKB 78/282 të datës 23 maj 2024, bashkë me deputetët e SDA Sanxhak, Ahmedin Shkrijel dhe Selma Kuçeviç, në Parlament, nisëm një iniciativë për aprovimin e Rezolutës që dënon gjenocidin në Srebrenicë,” shkroi Kamberi në postimin e tij.
Shaip Kamberi cilësoi rëndësinë e kësaj rezolute, duke u shprehur se ajo përfaqëson një hap të rëndësishëm drejt drejtësisë, pajtimit dhe respektimit të të drejtave të njeriut në rajon. Ai gjithashtu pranoi se shanset për miratimin e rezolutës janë të ulëta për shkak të kulturës së negacionizmit të gjenocidit dhe krimeve të luftës që ekziston në politikën shtetërore të Serbisë. Megjithatë, ai nënvizoi rëndësinë e kësaj iniciative për të dëshmuar se në Serbi ekzistojnë forca politike që kundërshtojnë këtë politikë zyrtare.
Kamberi theksoi rëndësinë e ballafaqimit të Serbisë me krimet e kryera në të kaluarën dhe rolin e politikës shtetërore në negacionizmin e gjenocidit dhe krimeve të luftës. “Negacioni i gjenocidit dhe krimeve të luftës është shndërruar në kulturë të politikës shtetërore serbe, nuk mund të pritet që ajo të përkrahet nga shumica në Kuvendin popullor,” shtoi ai.
Rezoluta përfshin një sërë masash, përfshirë ndëshkimin e mohuesve të gjenocidit, garantimin e zbatimit të plotë të Konventës për Parandalimin dhe Ndëshkimin e Krimit të Gjenocidit, dhe zhvillimin e programeve arsimore që do të mësojnë brezat e ardhshëm për pasojat negative të gjenocidit dhe krimeve të luftës.
Aktualisht, nuk është e qartë se kur do të votohet kjo rezolutë në Kuvendin e Serbisë, dhe nëse do të miratohet, duke qenë se kërkon një shumicë të konsiderueshme votash për të kaluar.
