Pas skandalit të pagave, për muajin janar dhe muajin prill, zbulohet një tjetër skandal me të dhënat private të qytetarëve shqiptarë.
Pas publikimit të rrogave, të ID, numrit të telefonave, së fundmi po qarkullon edhe një databazë me targat e shqiptarëve.
Pas këtij skandali, ka reaguar Drejtoria e Përgjithshme e Shërbimeve të Transportit Rrugor. Në njoftimin e fundit të publikuar në faqen zyrtare,
DPSHTRR bën me dije se ka kërkuar ndihmën e kompanisë që mirëmban sistemin informatik.
DPSHTRR deklaron se kjo bazë të dhënash aksesohet nga shumë institucione dhe i shërben operatorëve ekonomik shtetëror dhe privat.
NJOFTIMI I DPSHTRR:
Drejtoria e Përgjithshme e Shërbimeve të Transportit Rrugor, sapo u njoh me lajmin mbi daljen e disa të dhënave për targat e automjeteve në Republikën e Shqipërisë, nisi menjëherë hulumtimin dhe kërkimin e suportit nga kompania që mirëmban sistemin informatik, e kontraktuar nga AKSHI. Ndërkohë që do të kryhet një analizë e plotë për të dalë me një qëndrim zyrtar të bazuar në fakte, bëjmë me dije se kjo bazë të dhënash aksesohet nga shumë institucione, me nivele të ndryshme aksesi, dhe i shërben edhe operatorëve ekonomik shtetëror e privat.
Kujtojmë se para dy ditësh në rrjet nisën të qarkullojnë të dhënat personale të shqiptarëve, si rroga, vendi i punës dhe ID, teksa një ditë më parë ‘gropa’ e skandalit u thellua me publikimin edhe të numrave të telefonit të qytetarëve.
