Një ditë pasi studentët e Fakultetit të Drejtësisë dhe të Ekonomisë, u përplasen fizikisht me policinë e shtetit, ka reaguar edhe Rektori i Universitetit të Tiranës, Mynyr Koni.
Në një postim në Facebook, Koni i ka dalë në mbrojtje studentëve, duke thënë se ata po kërkojnë të drejtën e tyre legjitime, ndërkohë që policia duhet të ndalojë dhunën e ushtruar ndaj tyre.
“Në vijim të ngjarjeve që ndodhën sot në Fakultetin e Ekonomisë dhe të Drejtësisë, si Rektor i Universitetit të Tiranës por edhe si pedagog prej shumë vitesh, shpreh indinjatën time të thellë personale për veprimet totalisht të papërgjegjshme të disa prej anëtarëve të forcave të rendit në ambientet e Fakultetit të Ekonomisë.
Studentët e UT janë në të drejtën e tyre legjitime për të protestuar si qytetarë të lirë të një vendi demokratik, për të kërkuar plotësimin e kërkesave të tyre për një arsim cilësor dhe bashkëkohor!”, -pohoi Koni.
Studentët e Juridikut, Ekonomisë dhe ata të Inxhinierisë dhe Arkitekturës, prej 3 ditësh janë ngujuar në ambjentet e Fakulteteve të tyre, në shenjë proteste kundër qeverisë Rama.
Ata u shprehen se nuk do të dalin nga ngujimi, deri në plotësimin e 9 pikave të kërkuara prej tyre.
