Anila Muçaj, atletja shqiptare dhe anëtare e klubit Born to Run, humbi jetën tragjikisht dy ditë më parë në moshën 48-vjeçare, pasi u përplas nga një fuoristradë në Blennerville, Irlandë.
Ajo po vraponte me dy miq të saj kur ndodhi aksidenti. Dy personat që ishin me të morën lëndime të lehta, ndërsa drejtuesi i fuoristradës, një i moshuar, u dërgua në spital.
Muçaj, një atlete e apasionuar, kishte marrë pjesë në shumë maratona vitet e fundit. Pas ngjarjes tragjike, klubi i saj publikoi një postim ngushëllimi, duke shprehur dhimbjen për humbjen e Anilës dhe duke ofruar lutje për bashkëshortin dhe dy fëmijët e saj, si dhe për miqtë që ishin me të në momentin e aksidentit.
“Sot kemi mbetur të shkatërruar nga lajmi tragjik se bukuroshja jonë. mikesha e mirë Anila ka ndërruar jetë pas një aksidenti, lutjet tona janë me bashkëshortin dhe dy djemtë e saj të bukur dhe me gjithë familjen e Anilës në këtë kohë. Ne lutemi edhe për Klerën dhe Klarën që vraponin me Anilën që të shërohen plotësisht, mendimet tona janë me të gjitha familjet këtë mbrëmje”.
Në një reagim, Kryetari i Bashkisë së Tralee, Mikey Sheehy, e cilësoi vdekjen e Anilës si një “tronditje të madhe” për qytetin.
