Vajza e gjyqtares Enkelejda Hoxha ka deklaruar se mamaja e saj ka qenë e detyruar të lironte të dënuarit!
Një një intervistë për mediat, ajo ka thënë ndër të tjera se media po i dëmton imazhin, sakaq ka shtuar se do të jetë e pranishme në seancën që do të zhvillohet ditën e sotme ku do të jepet masa e sigurisë.
“Ka 16 vjet në Krujë, media po i dëmton imazhin, nuk është mami im siç thotë media, nuk ka në pronësi asnjë makinë e shtëpi. Media po i dëmton imazhin. Do marrim pjesë në seancën e mamit dhe do dëgjojmë masën e sigurisë së saj, mami është shumë e ndershme dhe e pastër, ka pasur një arsye të fortë për t’i liruar ato. Mund të jetë detyruar për të liruar kriminelët. Po, ka qenë e detyruar për të liruar kriminelët. Mami nuk më ka shprehur shqetësimin, por me sa kam dëgjuar, kam arritur në konkluzionin se ka qenë e detyruar”, tha vajza Anta Kraja para nisjes së seancës.
Sot pritet që gjyqtarja Enkeleida Hoxha së bashku me avokatin Aldo Tabakun dhe 8 të arrestuarit e tjerë do të dalin para gjykatës për t’u njohur me akuzat, për të cilat SPAK i arrestoi.
Kujtojmë se mjeku Edvin Prifti u burgos pasi përgjimet tregojnë që ai u pagua nga sekretarja e gjykatës për të operuar të ëmën përballë shumës prej 2 mijë euro.
Bazuar në përgjimet, SPAK thotë se gjyqtarja Enkelejda Hoxha u implikua nga avokati Aldo Tabaku, i cili sipas vëzhgimeve ambientale takohej me gjyqtaren në një banesë të marrë me qira në kryeqytet.
