SPAK hap garën për kreun e ri të BKH-së

Mandati pesëvjeçar i Aida Veizajt (Hajnaj) në krye të Byrosë Kombëtare të Hetimit përfundon më 31 gusht 2025, dhe SPAK ka shpallur zyrtarisht garën për përzgjedhjen e drejtuesit të ri.

Në njoftimin përkatës, është përcaktuar edhe Komisioni i Përzgjedhjes që do të administrojë procesin, i përbërë nga prokurorët Altin Dumani, Arben Kraja dhe Behar Dibra.

Ligji i funksionimit të institucioneve kundër korrupsionit dhe krimit të organizuar parashikon se drejtuesi aktual, pas mbylljes së mandatit, ka të drejtë të rikthehet në pozicionin e mëparshëm ose të caktohet në një funksion të barasvlershëm.

Megjithatë, ligji nuk jep qartësime për kufizimin e mandateve apo mundësinë e rikandidimit.

Në muajin mars, Veizaj kishte paraqitur një kërkesë për rikandidim pranë Këshillit të Lartë të Prokurorisë, por kjo kërkesë u refuzua me argumentin se gara nuk ishte ende hapur. Nuk dihet ende nëse ajo do të aplikojë sërish.

Kush mund të kandidojë për kreun e ri të BKH-së

Sipas ligjit nr. 95/2016, kandidati duhet të jetë shtetas shqiptar dhe të përmbushë një sërë kriteresh ligjore, profesionale dhe morale. Disa prej kërkesave kryesore janë:

• Diplomë “Master i Shkencave” në drejtësi ose shkollë e lartë policore;
• Të ketë përvojë të paktën 5 vite në hetimin e çështjeve penale për korrupsion apo krim të organizuar;
• Të mos ketë pasur funksione politike në dhjetë vitet e fundit;
• Të mos jetë subjekt i hetimit penal ose i ndonjë mase disiplinore në fuqi;
• Të mos ketë qenë bashkëpunëtor i shërbimeve inteligjente apo pjesë e strukturave të ish-Sigurimit të Shtetit;
• Të pranojë t’i nënshtrohet testit të poligrafit.

Procesi i përzgjedhjes

Kandidatët duhet të dorëzojnë aplikimet e tyre deri më 7 maj 2025 në zarf të mbyllur, pranë Sektorit të Arkiv-Protokollit të Prokurorisë së Posaçme.

Procedura e përzgjedhjes përbëhet nga 7 faza:
1. Verifikimi i dokumentacionit
2. Testi i arsyetimit logjik
3. Kontrolli mjekësor
4. Testi fizik
5. Ese me shkrim
6. Intervista
7. Verifikimi i figurës, pasurive dhe testi i poligrafit

Në përfundim, Komisioni i Përzgjedhjes do të paraqesë në KLP listën me kandidatët që plotësojnë kushtet dhe do të vendoset për drejtuesin e ri të BKH-së.