Skandali seksual me 12-vjeçaren në Tiranë/ 29-vjeçari pranon marrëdhënien, çfarë dihet për rolin e tezes

Detaje të reja janë zbuluar nga rasti i rëndë në Tiranë, ku një vajzë 12-vjeçare dyshohet se është abuzuar seksualisht nga dy të afërm të saj. Në pranga kanë përfunduar tezja 32-vjeçare e të miturës dhe djali i hallës së saj, 29 vjeç, ndërsa hetimet vijojnë për të përcaktuar plotësisht rolin e secilit.

Dy të arrestuarit akuzohen për veprat penale “marrëdhënie seksuale me të mitur”, “incest” dhe “pornografi”. Ata i kanë mohuar akuzat.

Sipas raportimeve, 29-vjeçari me iniciale K.B. ka pranuar se ka kryer marrëdhënie me 12-vjeçaren, por ka pretenduar se kjo ka ndodhur “me dëshirën e të dyve”. Ky është pretendimi i dhënë prej tij përpara autoriteteve, ndërsa hetimi lidhet me një të mitur vetëm 12 vjeçe.

Ende më i paqartë mbetet roli i tezes 32-vjeçare. Ajo është arrestuar në kuadër të së njëjtës çështje, por rrethanat konkrete të përfshirjes së saj pritet të përcaktohen nga dëshmitë, materialet e sekuestruara dhe provat e tjera të administruara gjatë hetimit.

Rasti mësohet se doli në dritë pasi 12-vjeçarja dërgoi pa dashje një material me përmbajtje pornografike në një grup komunikimi. Materiali më pas mësohet se është shpërndarë gjerësisht, ndërsa vajza është ndjerë e bullizuar dhe ka kërkuar ndihmën e psikologes.

Informacioni iu përcoll familjarëve dhe më pas policisë. Pas sinjalizimit, e mitura u mor në pyetje në praninë e prindërve dhe psikologes. Dëshmia e saj dhe verifikimet e mëtejshme dyshohet se i kanë çuar hetuesit drejt materialeve të tjera dhe personave të përfshirë.

Bazuar në dëshminë e 12-vjeçares, autoritetet arritën te kushëriri i saj, djali i hallës, i cili u arrestua. Në pranga përfundoi gjithashtu tezja e vajzës, ndërsa roli konkret që ajo dyshohet se ka pasur në ngjarje mbetet ende për t’u sqaruar nga hetimi.

Mësohet se episodet që po hetohen kanë ndodhur në rrethana të ndara. Në telefonat celularë janë gjetur video me përmbajtje të rëndë, të cilat policia i ka sekuestruar.

Ekspertiza e aparateve dhe analizimi i materialeve të sekuestruara pritet të jenë vendimtare për dokumentimin e plotë të ngjarjes dhe për të përcaktuar rrethanat dhe përgjegjësinë e secilit prej personave të përfshirë.

Dy të arrestuarit janë ende pa masë sigurie, ndërsa hetimet vazhdojnë për zbardhjen e plotë të rastit.